Karera sa PBA bubble MVP Parks, Abueva maoy nag-una

CEBU, Philippines — Nag-una na sila si Bobby Ray Parks sa TNT Tropang Giga ug Calvin Abueva sa Phoenix Super LPG Fuel Masters sa karera sa statistical points nga maoy basihan pagpili sa MVP ning PBA bubble season.

Kay nangatagak na man ang iyang mga karibal, hayag na kaayo ang tsansa ni Parks nga angkonon ang labing prestihiyosong award sa Philippine Cup.

Human sa semifinals, si Parks maoy nangu sa mga kandidato uban ang 38.3 SPs (statistical points) gikan sa iyang average nga 22.5 points, 8.1 rebounds, 3.1 assists ug 1.3 steals matag duwa.

Samtang si Abueva kalit lang misulbong sa ikaduhan dapit uban ang 37.1 SPs gikan sa iyang average nga 15.4 points, 11.3 rebounds, 5.2 assists ug 1.7 steals sud sa 12 ka duwa sukad siya nakabalik gikan sa 16 ka bulan nga suspensiyon. Si Jaymar Perez sa TerraFirma Dyip, ang scoring leader uban ang 24.4 puntos matag duwa, nahimutang sa ikatulong puwesto bitbit ang 35.7 SPs. Naglangkob sab top 9 mao sila si Matthew Wright sa Phoenix (35.6), Christian Standhardinger sa NorthPort (34.6), RR Pogoy sa TNT (33.5), Stanley Pringle sa Ginebra (33.1), Jason Perkins sa Phoenix (32.7) ug Scottie Thompson (32.7) sa Ginebra.

Samtang sila si Roosevelt Adams sa TerraFirma ug Aaron Black sa Meralco maoy nag-unang mga kandidato alang sa Rookie of the Year. Apan si Black lagmit maoy mosakmit sa pasidungog gumikan kay ang Bolts nakatikang man sa semifinals.