24 golds na nahipos ni De los Santos

CEBU, Philippines — Nakatigum na og 24 ka gold ang Sugboanong world No.1 e-karateka nga si James de los Santos. Kini human gipilde sa 30-anyos nga si De los Santos si world No. 3 Matias Domont Moreno sa Switzerland, 24.9-23.7, aron maghari sa ikalimang edisyon sa SportData eTournament World Series. Sukad nga iyang giapsan ang kanhi lider nga si Eduardo Garcia sa Portugal sa miaging bulan, gipadak-an pa ni De los Santos ang iyang labaw sa iyang mga karibal. Sa kasamtangan, ang pambato sa International Shotokan Karate Federation dinhi sa Pilipinas nakatigum na og 11,920 puntos nga seguradong moburot pa kon maihap na ang mga puntos nga iyang nadaog gikan sa world series.