NBA pre-season games kasado na
CEBU, Philippines — Gipagawas na sa NBA ang iskedyul sa ilang pre-season games nga gikatakda karong Disyembre 11 hangtod 19.
Sa kinatibuk-an, 49 ka pre-season games ang ipahigayon diin ang mga teams gipaabot nga mobaid ug motimbang-timbang sa ilang kapasidad alang sa umaabot nga 2020-2021 season nga mosikad sa Disyembre 22.
Matag team dunay tagurha ka duwa, usa sa ilang korte ug ang usa sa balwarti sa ilang kontra.
Lima ka duwa ang gikatakda sa Disyembre 11, apil na niini sangka tali sa defending champion Los Angeles Lakers ug sa silingan niining LA Clippers didto sa Staples Center.
Si Luka Doncic ug ang Dallas Mavericks manulong batok ni two-time reigning MVP Giannis Antetokounmpo ug Milwaukee Bucks karong Disyembre 12.
Gipanglantawan nga si Kevin Durant posibleng moduwa na uban sa Brooklyn Nets sa labing unang higayon didto sa Barclays Center diin ilang harungon ang Washington Wizards karong Disyembre 13.
Sa iyang bahin, si Doc Rivers mo-debut isip coach sa Philadelphia 76ers karong Disyembre 16 batok sa Boston Celtics.
Samtang ang Toronto Raptors moduwa sa unang higayon didto sa Tampa, Florida, ang temporatyo nilang homecourt batok sa Miami Heat sa Disyembre 18.
- Latest