Jersey nilang LeBron, Jordan isubasta

CEBU, Philippines — Ang mga fans nilang LeBron James ug Michael Jordan makahigayon pag-angkon og mahinungdanong butang gikan sa ilang idolo.

Kini gumikan kay isubasta man karong Disyembre 4 didto sa Beverly Hills ang pipila ka mga memorabing butang sa duha ka giyukboan nga labing maayong basketbolista sa kasaysayan.

Apil sa i-auction ang uniporme ni James nga iyang gipirmahan atol sa iyang rookie NBA season uban sa Cleveland Cavaliers.

Ang maong jersey nga gipirmahan ni James niadtong 2003-2004 NBA rookie season, gikonsiderar nga usa sa labing una nga jersey nga dunay autograph ni James. Gibana-bana nga paliton kini sa kantidad nga gikan sa $100,000 ngadto sa  $200,000.

Sukad sa iyang pagka-rookie, si James misulbong ngadto sa usa ka sertipikadong superstar nga nakadaog og upat ka NBA title sa tulo ka managlahing teams.

Gawas sa jersey ni LeBron, isubasta sab ang No. 23 jersey nga gisul-ot ni Jordan atol sa iyang "Signing Day" uban sa Chicago Bulls niadtong 1984.