Pagbalik ni Klay Thompson nabaraw
CEBU, Philippines — Nabaraw ang pagduwa og balik ni Golden State Warriors All-Star guard Klay Thompson sa umaabot nga 2020-2021 NBA season.
Kini human si Thompson nakahiagum na sab og injury sa iyang tiil. Si Thompson wala makaduwa sa tibuok nga bahin sa miaging season gumikan sa ACL injury nga iyang naangkon sa Game-6 sa 2019 NBA Finals diin sila gipaksit sa Toronto Raptors.
Nabalikan na unta si Thompson sa maayong panglawas, apan nayayay na sab kini samtang nag-workout duha ka adlaw ang milabay.
Human sa medical examination, nasuta sa Warriors nga dili na puwedeng makaduwa og balik sa Thompson.
Sa dihang nasayod sa dili maayong balita nga gipahibawo kanila ni Warriors general manager Bob Myers, nangahilom inubanan og tumang kaguol ang duha ka superstars sa Warriors nga sila si Stephen Curry ug Draymond Green.
Si Thompson usa sa mga sinaligan sa Warriors sa mabungahon kampanya sa Warriors diin sila nakasud sa NBA Finals sud sa lima ka sunod-sunod nga higayon ug nakamiyon niadtong 2015, 2017 ug 2018.
- Latest
