Stoudemire gikuhang assistant coach sa Brooklyn

CEBU, Philippines — Kanhi NBA All-Star player nga si Amar'e Stoudemire gikuhang assistant ni Brooklyn Nets head coach Steve Nash.

Ang maong lakang naghiusa sa usa sa labing hait nga pick-and-roll nga kombinasyon sa NBA. Mao kini ng nahulma nilang Nash ug Stoudemire sa dihang nagduwa pa sila uban sa Phoenix Suns sa sayong bahin sa dekada 2000. Si Nash bag-o lang gikuha nga coach sa Nets diin iyang dad-on ang duha ka NBA superstars nga sila si Kevin Durant ug Kyrie Irving. Mao kini ang labing una niyang trabaho isip head coach sukad siya nagsilbe nga player development consultant sa Golden State Warriors sud sa lima ka tuig.

Sa iyang bahin, si Stoudemire nakaduwa og 14 ka seasons sa NBA diin siya mi-average og 18.9 points, 7.8 rebounds, 1.2 assists ug 1.2 blocks matag duwa. Siya maoy 2002-2003 Rookie of the Year ug nahimong NBA All-Star unom ka higayon.

Mitali siya og 17.3 points ug 6.7 rebounds matag duwa aron tabangan ang New York Knicks nga langkaton ang Atlantic Division title niadtong 2013.  Mipakita siya og aksiyon sa katapusan nga higayon sa NBA uban sa Miami Heat niadtong 2015-2016 season.