PBA player nagpositibo sa COVID-19
CEBU, Philippines — Usa ka PBA player nagpositibo sa Covid-19 sud sa giplastada nga bubble sa liga didto sa Clark, Pampanga.
Sa usa ka press conference kagahapon sa buntag, gipahibawo sa PBA nga ang reperi nga nagpositibo sa gikahadlokang virus niadtong Miyerkules sa miaging semana nag-negatibo na human sa confirmatory tests.
Apan usa ka player sa Blackwater Elite ang na-test nga positibo ug gibuwag na kini sa iyang team ug gidala didto sa Athletes Village sa Capas, Tarlac alang sa dugang pang mga tests.
Gi-isolate na ang tibuok Elite team ug nailhan na sab kadtong uban pang close contacts sa maong player.
Tungod niini, gikanselar ni PBA commissioner Willie Marcial ang duwa tali sa Blackwater ug Rain or Shine Elasto Painters nga gikatakda unta sa alas-4 sa hapon kagahapon. Isibog kini ngadto sa laing petsa nga wala pa hibaw-i.
Gipasaligan hinuon sa PBA ang publiko nga ang tanang patakaran sa kaluwasan ug panglawas padayon nilang gisunod sud didto sa Clark bubble.
- Latest