GMs Paragua ug Antonio mangu sa top contenders sa CEPCA 30th Anniversary Chess Tournament

CEBU, Philippines — Dul-an sa 200 ka players apil na ang usa ka pundok sa tadhang chess masters sa nasud ang magtige sa ilang abilidad sa "4th Engr. Boy 'Chessmoso' Pestaño Memorial Chess Tournament" nga gipasiugdahan sa Cebu Executives and Professionals Chess Association (CEPCA) agi'g kasaulogan sa ika-30 niining anibersaryo.

Sila si Grandmasters Mark Paragua ug Joey Antonio ug Cebuano International Master Barlo Nadera maoy mangu sa listahan sa lig-ong mga entrante ning 15 ka hugna nga kompetisyon nga duwaon pinaagi sa lichess.org sugod sa alas-5:30 sa hapon ugmang adlawa.

Gipaabot nga mohatag kanila og malisud nga hagit mao sila si National Masters Elwin Retanal, Merben Roque, Rommel Ganzon, Jethro Morado, ug Giovanni Mejia ug ingon man ang teen prodigy nga si Alekhine Nouri, ang labing bata nga FIDE Master sa kalibotan sa edad nga siyete ug mao karon ang No.1 player sa nasud

Ang pipila ka mga pambato sa Sugbo nga sila si Richard Natividad, Brylle Arellano, Antonio Cabibil, Yves Christian Fiel, Ruel Nuttal, Allan Pason ug uban pa mopakita sab og aksiyon ning online tournament nga gipahigayon agi'g pahinungod ni anhing Boy Pestaño, usa sa mga nagtukod sa CEPCA niadtong 1990.  Alang sa dugang mga impormasyon, mahimong mokontak ni Jun Olis sa 0942-4641565 o bisitaa ang Fabecook page sa CEPCA.