Nangiwit nga teams mag-abot sa PBA bubble
CEBU, Philippines — Usa ang magmaya, samtang ang usa magpadayon ang kalbaryo sa dihang ang nangiwit nga teams nga Terrafirma Dyip ug NorthPort Batang Pier mag-abot karong adlawa sa PBA Philippine Cup bubble play didto sa AUF Sports Arena sa Angeles City, Pampanga.
Padung na sa tunga-tungang bahin sa usa ka hugna nga eliminasyon, ang duha ka teams parehong nangitlog.
Ang Batang Pier wala pa makadaog human sa upat ka duwa, samtang ang Dyip bokya pa gihapon sa tulo ka biyahe.
Mao kini ang hinungdan nganong ang duha ka koponan nagpangagot nga mokulit og daog sa ilang engkuwentro sugod sa alas-4 sa hapon.
Sa miagi hinuon nilang duwa, ang Batang Pier nabiktima sa sayop nga tawag nga miresulta sa 68-70 nilang kapildihan ngadto sa Rain or Shine Elasto Painters.
Sama sa Batang Pier, ang Dyip wala pa mawad-i og paglaum ug si coach Johnedel Cardel nanghinaut nga makahimo sila og maanindot nga pagbalitok sa katapusan nilang walo ka duwa.
- Latest
