CEBU, Philippines — Ang wa'y pildeng flyweight contender sa Sanman Gym nga si Jayson "Smasher" Mama (15-0, 8KOs) mag-atubang sa labing dako nga away sa iyang karera sa dihang iyang hagiton si IBF champion Moruti "Babyface" Mthalane (39-2, 26KOs) karong Disyembre 20 didto sa Durban, South Africa, ang yutang natawhan ni Mthalane.
Sa miagi niyang away niadtong Pebrero 29, ang IBF ranked No. 3 nga si Mama mipatikangkang ni Reymark Taday sud lamang sa tulo ka hugna didto sa Lagao Gym sa General Santos City.
Si Mama angay nga mangandam sa usa ka bug-at nga tahas batok ni Mthalane. Dili lamang siya manulong sa teritoryo sa iyang kontra, moaway sab siya sa labing unang higayon gawas sa Asya.
Sa iyang bahin, ang 38-anyos nga si Mthalane modepensa sa ikaupat nga higayon sa ikaduha na niyang paghari sa IBF flyweight division.
Si Mthalane mopakita og aksiyon atubangan sa iyang mga kababayan sa labing unang higayon sud sa tulo ka tuig. Iyang naangkon ang kasamtangan niyang trono didto sa Malaysia ug napanalipdan kini usa ka higayon didto sa Macau ug duha ka higayon didto sa Japan.
Mikulit sab si Mthalane og impresibong kadaogan batok sa pipila ka dekalibreng mga kontra apil na niini ang kababayan niyang si Zolani Tete ug ang Pinoy'ng si John Riel Casimero nga karon usa na ka three-division world champion, pulos pinaagi sa 5th round TKO.