CEBU, Philippines — Ang Los Angeles Clippers pormal nga mipahibawo kagahapon nga ila nang gi-promote si Tyronn Lue gikan sa assistant ngadto sa head coach.
Walay detalye sa kontrata nga gipagawas, apan gitaho sa pipila ka US media nga si Lue miuyon nga mo-coach sa Clippers sud sa lima ka tuig.
Si Lue mao ang kanhi assistant coach ni Doc Rivers nga sayo ning bulana gikuha nga head coach sa Philadelphia 76ers.
Gipalagpot sa Clippers si Rivers human sila gitagak sa Denver Nuggets sa NBA Western Conference semifinals bisan og naglabaw, 3-1 sa serye.
Sa wala pa motapon sa Clippers, si Lue maoy coach ni LeBron James ug sa Cleveland Cavaliers sa dihang nasakmit sa Cavaliers ang labing una nilang kampiyonato sa NBA niadtong 2016.
Sa laing bahin, ang Indiana Pacers mitudlo ni Nate Bjorkgren isip bag-o nilang head coach. Si Bjorkgen maoy mohulip sa dapit ni Nate McMillan nga surprisang gitagak sa Pacers niadtong Agosto.
Ang 45-anyos nga si Bjorkgren nagsilbeng assistant coach ni Nick Nurse sa Toronto Raptos nga nakampiyon sa 2019 NBA season ubos sa liderato ni Kawhi Leonard.