Spence mitawag ni Pacquiao nga 'living legend'

CEBU, Philippines — Wala pa sila magsangka ibabaw sa ring, labaw nang wala pa sila magkita sa personal, apan ang wa'y pildeng WBC ug IBF welterweight champion nga si Eroll 'The Truth' Spence Jr. napuno og respeto ug pagdayeg ni Pinoy ring star Manny Pacquiao.

Si Spence (26-0, 21KOs) dugay nang gisaytan si Pacquiao bisan wala pa nahulma ang gihandum niyang away, naglantaw siya sa unahan nga maengkuwentro ang bugtong eight-division world champion sa kasaysayan sunod tuig,

“He’s on his way out, so I’d love to have that fight,” matud pa ni Spence segun sa taho ni Scott Christ sa badlefthook.com

“Pacquiao has been in the sport 20-something years, he’s an icon even outside the sport. Everybody knows who Manny Pacquiao is. That would be a great fight for me,” dugang pa ni Spence, nga mitawag ni Pacquiao nga usa ka "living legend".

Apan sa dili pa siya maghuna-huna ni Pacquiao, gikinahanglan nga atimanon usa sa 30-anyos nga si Spence ang umaabot niyang pagdepensa sa iyang WBC ug IBF titles batok ni kanhi two-division world champion Danny Garcia (36-2, 21KOs) karong Disyembre 5 didto sa AT&T Stadium sa Arlington, Texas.

Kon modaog, lagmit mao kana ang magtuboy ni Spence ngadto sa gitinguha niyang unification bout uban ni Pacquiao (62-7-2, 39KOs), ang kasamtangang WBA Super welterweight champion.