Garbo sa sugbo: RR Pogoy unang 'Player of the Week' sa PBA bubble

CEBU, Philippines — Ang Sugboanong si RR Pogoy sa TNT Tropang Giga maoy gipasidunggan nga labing unang "Player of the Week" sa PBA bubble.

Si Pogoy mipauwan og 10 ka tres sa iyang career-high 45 puntos nga nagtuboy sa Tropang Giga ngadto sa 100-95 nga kadaogan batok sa Alaska Aces atol sa una nilang duwa didto sa Angeles University Sports and Cultural Center.

Human niini, ang 6-foot-2 guard gikan sa Minglanilla, Cebu mirehistro og 11 puntos, siyam ka rebounds ug duha ka steals sa 112-101 nilang kadaogan batok sa TerraFirma Dyip, 112-101.

Bisan og dunay gihambin nga sakit sa iyang tiil, si Pogoy mipakita gihapon sa iyang katakus aron pagposte og 15 puntos ug  upat ka rebounds sa ilang pagpilde sa defending champion San Miguel Beermen.

Gumikan niini, ang 28-anyos nga si Pogoy maoy gitunolan sa senemanang pasidungog sa liga. Iyang gipilde ang teammate niyang si Ray Parks Jr. ug si Matthew Wright sa Phoenix Super LPG Fuel Masters.

Sa laing bahin, si Adrian Wong sa Rain or Shine Elasto Painters maoy gibayaw nga Rookie of the Week.