Lopez mipakurat ni Lomachenko

CEBU, Philippines — Gitay-og ni Teofimo Lopez ang kalibotan sa boksing dihang iyang gipilde pinaagi sa 'unanimous decision' ang inilog nga si Vasiliy Lomachenko sa 12 ka hugna nilang kumbati  aron angkonon ang dungog isip undisputed world lightweight champion.

Si judge Tim Cheatham miiskor og 116-112, si Julie Lederman mitali og 119-109, samtang si Steve Weisfeld mikulit og 117-111 pulos pabor ni Lopez nga gawas nagpabiling wa'y pilde sa 16 ka away uban ang 12KOs, mibira sab sa WBA, WBC ug WBO titles ni Lomachenko aron idugang sa iyang sa korona isip IBF champion.

Giputol sab sa 23-anyos nga si Lopez ang 13 ka sagunson nga daog ni Lomachenko nga nadakin-as ngadto sa 14-2 uban ang 10KOs.

Padung sa away, inilog kaayo si Lomachenko nga wala na mapilde pa sukad siya gibihag sa Mehikanong si Orlando Salido pinaagi sa split decision niadtong Marso 2014 didto sa Alamodome sa San Antonio, Texas.

Apan si Lopez mipakita og igong kadasig ug tumang katakus aron tay-ugon ang kalibotan sa boksing.

Gikan sa pagsugod, ang kusgan ug agresibo nga si Lopez mao ang nagpunay og asdang ngadtong Lomachenko nga tihik kaayo og kumo sa nag-unang unom ka hugna.

Namawi man tuod si Lomachenko sa nahibiling unom ka hugna sa aksiyon, apan si Lopez sa kanunay miparang sa gilusad nga ataki sa iyang kontra.