Striegl nasugamak sa UFC debut

CEBU, Philippines — Nahisukamod ang Pinoy'ng si Mark Mark Striegl sa iyang UFC debut sa makapadismaya nga paagi.

Kini gumikan kay ang Russian niyang kontra nga si Said Nurmagomedov nanginahanglan lamang og 51 segundos aron siya makuyapan ug undangon ang away.

Ang 32-anyos nga si Striegl natumba dayon sa sayong bahin pa lamang sa away human maigo sa solidong counter left  ni Nurmagomedov.

Ang Russian wala na maglangan pagbayo og brutal nga mga suntok sa nahayang nga si Stiegl hinungdan nga ang kulatadong Pinoy nawad-an kadiyot sa iyang panimuot.

Si Striegl miaway sa UFC sa labing unang higayon human siya makarekober sa Covid-19.

Sa iyang bahin, si Nurmagomedov mirehistro sa ikatulo niyang daog nga giatbangan og usa ka pilde.