Doc Yong mikulit laing kasaysayan
CEBU, Philippines — Ang tinamod nga eye surgeon ug ultra racer nga si Dr. Potenciano “Yong” S. Larrazabal III misuwat og laing kasaysayan sa mabulukon niyang karera sa dagan human siya nahimo nga labing unang Pinoy nga nalakip sa Official 8 Continents Marathon Club.
Si Doc Yong ika-255 nga miyembro sa maong eksklusibong grupo nga nakahuman og walo ka marathon (42km) sa walo ka mga kontinente, apil na ang Zealandia.
Gisugdan sa presidente ug chairman sa CebuDoc Group ang iyang misyon niadtong 2013 Brussels Marathon sa Brussels, Belgium (Europe) nga iyang gihuman sud sa tulo ka oras ug 40 minutos.
Karon, iya nang nakumpleto ang tanang walo ka marathons.
Naglakip sa makutas niyang nanabigar mao ang 2014 Kawasan Falls Marathon sa Cebu, Philippines (Asia; 3 hrs 39 mins), ang 2014 Mountain to Surf Marathon sa Taranaki, New Zealand (Oceania; 3 hrs 37 mins), ang 2016 Mountains 2 Beach Marathon sa California, USA (North America; 3 hrs 23 mins), ang 2019 Marrakech Marathon sa Marrakech, Morroco (Africa; 3 hrs 58 mins), ang 2019 Sao Paulo Marathon sa Sao Paolo, Brazil (South America; 4 hrs 17 mins), ug ang 2019 Auckland Marathon in Auckland, New Zealand (Zealandia; 4 hrs 58 mins).
Niadtong Disyembre 2019, nakumpleto ni Larrazabal ang 8th Continents Marathon sa dihang iyang nahuman ang Antarctic Ice Marathon didto sa Union Glacier, Antarctic (Antartica; 6 hrs 16 mins).
"I feel blessed that somehow all my goals in running, I have already achieved them, more or less,” matud pa ni Larrazabal. “I am grateful and I feel blessed to be officially part of the 8 Continents Marathon Club and this wouldn’t be possible without prayers, training and support of my family and friends.”
- Latest
