"Team Battle" chessfest mosikad na

CEBU, Philippines — Miabot ngadto sa 32 ka teams ang magpinug-anay sa utok sa ikapitong leg as Stay at Home Chess Challenge nga giulohan og "Team Battle" sugod karong adlawa sa lichess.org.

Ang mga partisipante gibahin sa lima ka brackets.

Mopakita sila og aksiyon sa eliminasyon nga kumbatihan karon. Ang top 2 teams matag bracket moabante sa finals diin segurado na sila sa top 10.

Sa finals karong Domingo, ang nahibiling 10 ka teams moduwa og laing hugna.

Ang makampiyon mobulsa og P9,000, samtang ang mopahiluna sa ikaduha ngadto sa ikatulong dapit makadawat og P6,000 ug P3,000. Ang 4th ug 5th mokubra og P1,500 matag usa, samtang ang 6th ngadto sa 15th dunay madawat nga P600.