Tyronn Lue bag-ong head coach sa Clippers
CEBU, Philippines — Si Tyronn Lue mao na'y molingkod isip bag-ong head coach sa Los Angeles Clippers.
Segun sa taho sa ESPN ug USA Today, si Lue miuyon nga mohulip sa puwesto nga gibakantihan ni Doc Rivers sud sa lima ka tuig. Si Rivers mibiya sa Clippers duha ka semana pa ang milabay.
Ang 43-anyos nga si Lue mitimon sa Cleveland Cavaliers ngadto sa labing una niining NBA title niadtong 2016.
Niadtong panahona, ang Cavs gipangulohan pa ni LeBron James nga nakampiyon na sab ning bag-o sul-ot ang uniporme sa LA Lakers.
Ning NBA season, si Lue nagsilbe nga assistant coach sa Clippers nga natagak sa Western Conference semifinals bisan pa man sa presensiya nilang Kawhi Leonard ug Paul George.
Isip NBA head coach, si Lue dunay 128-93 win-loss record. Sa dihang player pa siya, iyang gitabangan ang Lakers nga makampiyon duha ka higayon niadtong 2000 ug 2001.
Gipaabot nga makig-uban ni Lue isip usa sa iyang mga assistant coach si kanhi NBA champion Chauncey Billups nga kandidato sab isip coach sa Indiana Pacers.
- Latest
