De los Santos world No.1 na gyud!

CEBU, Philippines — Human sa pipila ka bulan nga paningkamot, dedikasyon ug determinasyon, nakab-ot na gyud sa Sugboanong si Orencio James de los Santos ang iyang misyon nga mahimong No.1 online karateka sa tibuok kalibotan.

Sa labing uwahi nga e-kata world rankings nga gipagawas sa SportData niadtong Huwebes sa gabii, ang 30-anyos nga si De los Santos milayat ngadto sa  unang puwesto sa individual male seniors division uban ang 8950.00 puntos.

Iyang naapsan ang kanhi lider nga si Eduardo Garcia sa Portugal nga natagak sa ikaduhang dapit bitbit ang 8575.00 puntos.

Nakab-ot sa two-time Southeast Asian (SEA) Games bronze medalist ang iyang gitinguha human mikabkab og 13 ka sagunson nga bulawang medalya sukad siya nanghawod sa Balkan Open niadtong Hulyo 25.

Sa kinatibuk-an, duna na siya'y 16 ka golds, duha ka silvers ug tulo ka bronzes sa 20 ka mga torneyo nga iyang gisalmotan.

Nakuhit ni De los Santos ang ik-16 niyang bulawan human gibuntog si world No. 3 Silvio Cerone-Biagoni sa South Africa, 25.7-23.9 aron dominahon ang Golden League Karate eTournament Series #2.  Ang puntos nga iyang nadaog sa labing uwahi niyang kadaogan wala pa maapil sa world rankings.