Igsuon ni Inoue gisaytan sab ni Casimero
CEBU, Philippines — Lanog ug klaro kaayong gipadayag ni three-division world champion John Riel "Quadro Alas" Casimero (30-4, 21KOs) kon kinsa'y gusto niyang sangkaon sunod human sa malampuson niyang pagdepensa sa iyang WBO bantamweight title niadtong Domingo didto sa Mohegan Sun Hotel and Casino sa Uncasville, Connecticut. Ang 31-anyos nga si Casimero mikulit og impresibong daog pinaagi sa 3rd round TKO batok ni Duke Micah sa Ghana aron pagpabiling WBO champion.
Human sa iyang kadaogan, ang garbo sa Ormoc City mihagit og usab sa wa'y pildeng IBF/WBA unified champion nga si Naoya "The Monster" Inoue (19-0, 16KOs) sa Japan alang sa usa ka unification bout.
Gikatakda untang silang magsangka niadtong Abril didto sa Las Vegas, apan human nasibog pipila ka higayon, si Top Rank promoter Bob Arum nakahukom pagkanselar niini gumikan sa ekonomikanhong rason taliwala ning pandemiya. Kon ugaling dili gyud sila magkaabot ni Inoue, si Casimero nagkanayon nga andam siyang makigharong sa laing mga kampiyon sa 118-pound division nga si Luis Nery sa Mexico (WBC) ug Guillermo Rigondeaux sa Cuba (WBA). Naapil sab sa iyang listahan ang igsuon ni Inoue nga si Takuma, nga kanhi nagkupot sa WBC interim bantamweight belt.
- Latest
