Magsayo duna na'y bag-ong kontra

CEBU, Philippines — Ang wa'y pildeng featherweight contender nga si Mark Magsayo (20-0, 14KOs) makigsinukmagay batok sa bag-ong kontra nga si Rigoberto Hermosillo (11-2-1, 8KOs) sud sa 10 ka hugna nga main event sa FS1 Premier Boxing Champions (PBC) Fight Night nga ipasalida sa FOX Sports karong Oktubre 3 (Oktubre 4 dinhi sa Pilipinas) didto sa Microsoft Theater sa Los Angeles, California. Si Magsayo orihinal untang gikatakda nga makigsangka ni Jose "Pepito" Haro, apan gisurprisa ni Haro ang tanan pinaagi sa kalit niyang pagretiro duha ka semana sa dili pa ang away.

Sa gihapon, si IBF ranked No. 4 Magsayo nangandam sa usa ka lisud nga hagit batok ni Hermosillo gumikan kay sayod man siya nga kon mapilde madiskaril ang tanang nindot nga plano alang kaniya ni MP Promotions chief Sean Gibbons.

Ikaduha pa lamang kini nga higayon nga si Magsayo moaway sa Amerika sukad iyang gipakamang ang Mehikanong si Yardley Suarez sud lamang sa usa ka hugna sa makasaysayanong Pinoy Pride event sa ALA Promotions ug ABS-CBN Sports niadtong Oktubre 17, 2015 didto sa Stubhub Center sa Carson, California.

Mao sab kini ang labing unang pagkatkat ni Magsayo sa ring human midaog pinaagi sa unanimous decision batok ni Thai Panya Uthok niadtong Agosto 31 sa miaging tuig  didto sa Bohol Wisdom School gym sa Tagbilaran City, Bohol.

Sa iyang bahin, si Hermosillo wa'y pilde sa nag-una niyang 12 ka away, apil ang usa ka tabla, apan nasugamak sa miagi niyang duha ka away  pinaagi sa desisyon batok nilang Manny Robles III ug Viktor Slavinskyi sa miaging tuig.