PBA padayong mosuporta sa Gilas

CEBU, Philippines — Dili mobahar ang suporta sa PBA ngadto sa Gilas Pilipinas ilabi na sa internasyonal nga kompetisyon nga salmotan niini unya sa Pebrero 2021.

Kini bisan pa man ang PBA Season 46 magsugod sa Marso pa sunod tuig.

"Ang PBA team owners at ang PBA ay nanatiling committed na suportahan ang Gilas," matud pa ni PBA commissioner Willie Marcial.

Andam ang PBA nga ipahuwam ang mga players niini ngadto sa national team ubos sa paggiya ni program director Tab Baldwin.

Ning bag-o lang, ang FIBA Asia mipahibawo nga mogamit sila og bubble-type format sa mosunod nilang duha ka 2021 FIBA Asia Cup qualifiers karong Nobiyembre 2020 ug Pebrero 2021.

Wala hinuo'y plano ang Gilas nga mosalmot sa torneyo karong Nobiyembre, apan pursigido kini nga mopakita'g aksiyon sa Pebreyo nga iskedyul sa FIBA Asia qualifiers diin sila nabutang sa Bracket A uban sa Indonesia, Korea ug Thailand.