De los Santos mikabkab ika-11 nga gold

CEBU, Philippines — Padayong nagkayo ang misyon sa Sugboanong si James de los Santos nga makab-ot ang kinatas-ang bahin sa online karate world rankings.

Nadasig sa mainit niyang ratsada, gipukan ni De los Santos si Matias Moreno Domont sa Switzerland, 5-0 aron paglangkat sa korona sa Tokaido Maribor Open E-Tournament niadtong Martes sa gabii.

Mao kadto ang ikasiyam nga sagunson nga gold medal sa 30-anyos nga si De los Santos sukad siya nanghawod sa Balkan Open niadtong Agosto 3 ug ika-11 sa kinatibuk-an sa 16 ka mga torneyo nga iyang giapilan sukad sa sports lockdown niadtong Marso gumikan sa kalibutanong pandemiya. Gumikan sa iyang pagpangharos, ang pambato sa International Shotokan Karate Federation (ISKF) mipaduol sa iyang tinguha nga maapsan si world No.1 Eduardo Garcia sa Portugal.

"I’m just a few more points away from the no.1 spot. The grind must go on!" suwat pa sa two-time Southeast Asian (SEA) Games bronze medalist sa iyang Facebook page.