City Central School nanghawod sa 7th leg sa Online Dancefest
CEBU, Philippines — Si CJ Labra maoy misidlak nga labing hayag sa dihang gidominar sa City Central School ang ikapitong leg sa 1st Cebu City Barangay Grassroots Online Dancesport Competition niadtong weekend.
Mitunol si Labra og duha sa upat ka gold medals sa City Central nga nakasakmit sab og upat ka silvers ug usa ka bronze.
Nangharos sI Labra sa juvenile II girls chachacha ug jive.
Ang laing duha ka golds sa City Central gipugnit nilang Daniela Jasan Elumba (junior I girls closed chachacha) ug Viane Igloria (juvenile II girls closed jive).
Ang Punta Princesa maoy mipahiluna sa ikaduhang dapit uban ang tulo ka golds, usa ka silver ug usa sab ka bronze, samtang ang Labangon nga maoy nanghawod sa miaging unom ka legs, napunta sa ikatulong puwestong ning higayona uban ang tulo ka bulawang medalya ug usa ka bronze.
Si Gian Wayne Mangubat mihatag og duha ka golds sa Punta sa juvenile II boys chachacha ug jive, samtang si Gabriel Iya Min?ao mitunol og usa ka gold sa juvenile I girls closed chachacha.
Sa iyang bahin, si Rodre Yan Rodriguez nakaduha ka golds alang sa Labangon sa junior I boys closed chachacha ug jive, samtang si Jessa Mae Torrejas midugang og usa sa junior I girls open chachacha.
Ang mga pambato sa Pardo mikuha sab og atensiyon human ilang giharos ang tanang medalya sa juvenile I boys chachacha ug jive kortesiya nilang Nino Lepalam, Justine Benedict Castan?ares ug Wendell Aston Delantar.
Lain pang naka-gold medals mao sila si Daphne Lorraine De la Torre sa Consolacion (junior I girls closed jive), Juliet Monique Rallos sa Lahug (junior I girls open jive), Christian Pino sa Sambag 1 (junior II boys open chachacha) ug Jim Joscon sa Minglanilla (junior II boys open jive).
- Latest
