Obiena naka- bronze sa Rome

CEBU, Philippines — Ang pambatong pole vaulter sa Pilipinas nga si EJ Obiena milayat ngadto sa ikatulong dapit sa prestihiyosong Diamond League didto sa Rome, Italy kagahapon.

Si Obiena nga kwalipikado na sa Tokyo Olympics sunod tuig, mibuak sa iyang season-best record human nakuha ang gitas-on nga 5.80m sud sa tulo ka mga pagsuway nga nagdalit kaniya og bronze medal.

Mao kadto ang ikatulong bronze ni Obiena sud sa unom ka mga torneyo nga iyang gisalmotan ning tuiga diin siya nakapugnit sab og usa ka gold ug duha ka silver medals.

Nagtabla unta sila si Obiena ug ang silver medalist nga si Ben Broeders, apan si Broeders nanginahanglan lamang og duha ka pagsuway aron kab-oton ang gitas-on nga 5.80m hinungdan nga mao kini ang mipahiluna sa mas taas nga puwesto.

Si Armand Duplantis sa Sweden mibuak sa world record sa kompetisyon sa pagkuha niini sa gitas-on nga 6.15m aron langkaton ang bulawang medalya.