De los Santos pabiling nanginit

CEBU, Philippines — Ang garbo sa mga Sugboanon nga si James de los Santos mipahayag og maayo sa iyang kampanya nga katkaton ang kinatas-ang bahin sa online karate world rankings.

Kini human ang numero unong karateka sa nasud miabante sa finals sa duha ka mga kompetisyon nga iyang gisalmotan ning semanaha aron pagpanuktok og laing duha ka bulawang medalya.

Ang 30-anyos nga si De los Santos nga nagrepresentar sa International Shotokan Karate Federation sa Pilipinas, unang mipakaging ni Chrisley Philippart sa Belgium, 24.5-23.1, aron pagtikang sa kampiyonato sa Mitad Del Mundo Hatamoto Kai e-Tournament.

Iya dayong gibihag si Hugh Connolly sa Ireland, 24.3-23.8 alang sa ikaduha niyang sagunson nga pagtaak sa final round pinaagi sa SportData e-Tournament World Series.

Ang kanhi Southeast Asian (SEA) Games double bronze medalist nagkanayon nga ang World Series usa sa mga prestihiyosong torneyo gumikan kay kaupaton ang gidaghanon sa puntos nga ihatag sa mga modaog kon itandi sa ubang mga events.

Kon buligan na sab sa maayong palad, tataw nga si De los Santos mosikit og samot ni world No.1 Eduardo Garcia sa Portugal sa kinatas-ang bahin sa e-kata world rankings.

Si De los Santos mihakot og unom ka bulawang medalya nga nagsugod sukad iyang gidominar ang Balkan Open niadtong Agosto 3.

Sayo ning bulana, si De los Santos mikabkab og tulo ka gold medals sud lamang sa 24 oras timaan sa seryoso niyang misyon nga kab-oton ang No.1 spot sa umaabot.