Heat, Celtics pinaksitay na Clippers ug nuggets magtiwas
Cebu, Philippines — Sugdan na sa Miami Heat ug Boston Celtics ang ilang "best-of-seven" Eastern Conference finals karong adlawa didto sa NBA bubble sa Orlando, Florida.
Ang Heat miabante human gipalayas ang haring gangis nga Milwaukee Bucks, samtang ang Celtics nakalahutay sa confefence finals human gipalayas sa ilang trono ang defending champion Toronto Raptors.
Mao kini ang labing unang pag-abante sa Heat sa Eastern Conference Finals sud sa unom ka tuig. Nakadaog sila og duha ka sagunson nga kampiyonato sa NBA niadtong 2012 ug 2013 ug katapusang naghari sa Eastern Conference niadtong 2014.
Samtang ang Celtics katapusan nakampiyon sa NBA niadtong 2008 ug katapusan silang misulod sa conference finals niadtong 2010.
Seguradong dumot nga rematch ang mahitabo sa Celtics ug Heat nga nag-engkuwentro sa conference finals niadtong 2012.
Gipaabot nga mangu sa Heat mao si Jimmy Butler inabagan nilang Bam Adebayo, rookies Tyler Herro ug Duncan Robinson ug ingon man sila si Jae Crowder ug Andre Igoudala.
Samtang lauman sa Celtics mao sila si Jayson Tatum, Jaylen Brown, Kemba Walker ug Marcus Smart.
Sa laing bahin, magtiwas sab karon ang Los Angeles Clippers ug Denver Nuggers sa tagakay nga Game-7 sa ilang Western Conference semifinal series.
Ang modaog maoy makigharong sa nagpaabot nga LA Lakers sa Western Conference Finals.
- Latest