TNT gi-estudyohan aksiyon batok Williams
Cebu, Philippines — Gilantaw karon sa TNT KaTropa kon unsay sunod nilang aksiyon human madungog ang habig ni Kelly Williams nunot sa kalit niining pagretiro gikan sa PBA.
Si Williams mipahibawo niadtong Septiyembre 7 nga iya nang gituldokan ang iyang karera sa labing unang propesyonal nga liga sa Asya.
Apan wala mahimuot niini ang KaTropa sa iyang desisyon pinaagi lamang sa social media.
Tungod niini, gikonsidera sa TNT management si Williams nga AWOL (absent without official leave) ug ilang kining gimandoan nga mopasabot sa iyang mga aksiyon.
“He has communicated with us. We will handle this internally now,” matud pa ni TNT team manager Gabby Cui nga wala na mohatag pa og detalye kabahin sa kon unsay rason ni Williams sa gibuhat niini.
Si Williams nga duna pa'y buhi nga kontrata uban sa TNT hangtod karong Disyembre 31, miuban sa KaTropa didto sa Inspire Sports Academy sa Calamba, Laguna alang sa duha ka semana nga training bubble. Apan misibat siya nga wa'y pananghid human sa usa ka semana.
“He left our training camp without any notice or explanation,” sumala pa ni Cui dayong padayag nga hapsay ang ilang training sa Laguna bisan og wala ang 2008 MVP nga gibansagan og “Machine Gun.”
“Our bubble training went well. It was all skills and conditioning drills as prescribed by the PBA and IATF. Hopefully we can do full scrimmage soon,” nagkanayon si head coach Bong Ravena.
- Latest
