James Yap nakapahimulos sa pandemiya

Cebu, Philippines — Ang temporaryong pagkahunong sa aksiyon sa PBA nakahatag og higayon ni two-time MVP James Yap nga makapaalim sa hingpit sa injury nga mihamok kaniya uban sa Rain or Shine sa miaging season.

Apan wala siya magdahum nga sa ingon ani kadugayon.

Samtang ang taas nga pahuway nakatabang sa mga players nga nagparekober sa ilang mga injury sama kaniya, si Yap nagkanayon nga ang pagkainat sa panahon sa ilang pagkatanggong isip players dunay  dakong epekto kanila labi na sa ilang kondisyon.

"Medyo masyado lang matagal, kaya kakalawangin ka rin," matud pa ni Yap nga bag-ohay pang naabot gikan sa upat ka bulan nga pagpuyo didto sa Italy kauban ang iyang pamilya.

"Hahanapin mo pa rin yung naglalaro ka. Ilang months na e, siyempre limited din yung workouts mo, hindi nawo-workout lahat ng mga na-injured sa iyo before. Kumbaga humihina rin yun, e."

Miangkon si Yap nga anaa na unta siya sa maayong pisikal nga porma ug andam na nga mowadwad sa Philippine Cup nga opisyal nga misikad niadtong Marso 8.

Apan miulbo ang kalibutanong pandemiya nga nakapuwersa sa PBA paghunong sa ilang season nga hangtod karon wala pa mabalik.

"Yung pandemic sana one month lang kasi advantage sa akin yun para nakapag-pahinga yung katawan ko," sumala pa ni Yap. "Ito ilang months na, for me hindi maganda sa tingin ko, sa basa ng katawan ko. Kailangan mo kasing palakakasin din lahat ng parts ng katawan mo."

Si Yap gikatakda pang moapil sa inadlaw nga workout sa Rain or Shine gumikan kay nagkwarantin pa man siya sa kasamtangan subay sa patakaran sa kaluwasan ug panglawas nga gimando sa kagamhanan ilabi na niadtong mga PBA players nga mibiyahe og balik sa nasud gikan sa langyaw'ng dapit.