Obiena naka-bronze sa Monaco
CEBU, Philippines — Nagmalampuson si EJ Obiena sa ikaduha niyang torneyo taliwala ning pandemiya human siya mipugnit og bronze medal sa 2020 Monaco Diamond League kagahapon.
Ang pambatong pole vaulter sa Pilipinas nga si Obiena mikuha sa distansiya nga 5.70 metros bisan pa man sa taas-taas nga pahuway gumikan ning kalibutanong krisis panglawas aron mahimong labing unang Pinoy nga nakadaog og medalya sa maong kompetisyon.
Si Obiena ug ang silver medalist nga si Ben Broeder nagtabla unta, apan si Obiena nanginahanglan pa og duha ka attempts hinungdan nga nadakin-as siya sa ikatulong dapit. Ang world record-holder nga si Armand Duplantis sa Sweden mipatak og sayes metros aron sakmiton ang bulawang medalya. Sayo ning bulana, si Obiena nakabira og silver medal sa usa ka torneyo didto sa Trieste, Italy.
Si Obiena usa sa upat ka mga Pinoy nga kwalipikado na sa 2020 Tokyo Olympics nga giuswag sunod tuig. Ang laing tulo mao sila si gymnast Carlos Yulo ug boxers Irish Magno ug Eumir Marcial.
- Latest
