Tinagsip sa NBA: Slam dunk champ nayayay

CEBU, Philippines — Nayayay si Miami forward Derrick Jones Jr. human sila magbangga sa higanteng sentro sa Indiana nga si Goga Bitadze atol sa nga 109-92 nga kapildihan sa Heat ngadto sa Pacers kagahapong adlawa. Maayong pagkalagapak ni Jones sa iyang pagtugpa sa sawog human sila nagpakang si Bitadze. Naghigda siya sud sa pipila ka minutos sa wala pa gi-stretcher pagawas sa korte nga dunay brace ang iyang liog. Si Jones maoy midaog sa Slam Dunk contest sa miaging All-Star weekend niadtong Pebrero didto sa Chicago.

Divac nanaog sa puwesto

Nanaog si Vlade Divac sa iyang puwesto isip general manager sa Sacramento Kings. Temporaryong mihulip sa iyang puwesto mao si Joe Dumars nga sama kaniya bitoong player sab kanhi sa liga. Ang 52-anyos nga si Divac miduwa sa NBA gikan niadtong 1989 ngadto sa 2005 uban sa Kings, Los Angeles Lakers ug Charlotte Hornets samtang si Dumars, 57 anyos, kaduha nakampiyon sa 14 ka tuig niyang pagduwa uban sa Detroit Pistons gikan niadtong 1985 ngadto sa 1999. Ang Kings mitapos sa ilang season bitbit ang 31-41 win-loss record. Pakyas sila pagsud sa Western Conference playoffs sa ika-14 ka sagunson nga season.