Blazers, Grizzlies mag-ilog katapusang luna sa w. playoffs

MANILA, Philippines — Si Damian Lillard mipatuasik og 42 puntos ug mikubit og krusyal nga steal aron pagtuboy sa Portland Trail Blazers ngadto sa importanteng 134-133 nga daog batok sa Brooklyn Nets sa NBA kagahapon didto sa Walt Disney World sports complex sa Orlando, Florida.

Dako sab og natampo si CJ McCollum nga mikamada og 25 puntos ug ingon man si Jusuf Nurkic nga mipupo og 22 puntos ug 10 ka rebounds alang sa Blazers nga kaduha lamang mapilde sa walo ka duwa sukad sa pagsugod og balik sa NBA didto sa giplastada nilang bubble sa Disney World.

Ang Nets duna pa unta'y tsansa nga tagakon ang Blazers sa himalatyong segundos, apan wala masulod ang giitsang tres ni Caris LeVert nga mihipos og 37 puntos. Gumikan sa ilang kadaogan, ang Blazers miangkon sa No. 8 seed sa Western Conference, apan ila pang sangkaon ang Memphis Grizzlies sa play-in ugmang adlawa.

Ang Blazers duna hinuo'y twice-to-beat advantage sa Grizzlies nga mipabuhi sa ilang tsansa sa playoffs human gilampaso ang Milwaukee Bucks sa iskor nga 119-106.

Kon ugaling modaog ang Memphis batok sa Portland ugma, duwaon ang tagakay nilang duwa karong Lunes. Ang mopatigbabaw sa ilang mahinungdaong duwa maoy makigharong sa West top seed nga Los Angeles Lakers sa unang hugna sa best-of-seven NBA playoffs nga sugdan karong Agosto 18. —