Football players mikisaw sab
MANILA, Philippines — Human sa basketball ug volleyball, ang football na sab maoy mihimo og kasikas sa Cebu sports.
Kini human ang duha ka soccer players sa Sacred Heart School-Ateneo de Cebu (SHS-AdC) nga sila si Leon Maquiling ug Yoojin Kim nakahukom nga adto na sab mangindahay sa ilang karera didto sa kaulohan. Si Maquiling adto na moduwa sa Ateneo de Manila University men’s football team, samtang si Kim sa University of the Philippines women’s football squad sa UAAP Season 83 sunod tuig.
Ang duha pulos produkto sa komprehensibong programa sa paugnat sa kusog sa Ateneo de Cebu. Parehong silang nakadawat og St. John de Brebeuf Award isip Most Outstanding Athletes of the Year ning Batch 2020 sa tunghaan.
Si Maquiling nga nahilig og football sa dihang Kinder 2 pa lamang siya sa edad nga sayes anyos, migiya sa Magis Eagles ngadto sa duha ka kampiyonato sa CESAFI niadtong 2016 ug 2018.
Kabahin sab siya sa Team CVIRAA nga mipakita'g aksiyon sa Palarong Pambansa gikan niadtong 2014 ngadto sa 2018. Nasakop sab siya sa Philippine national age group teams sa Under 14, Under 16 ug Under 18.
Sa iyang bahin, si Kim usa sa mga pambato sa Lady Magis Eagles nga naka-grandslam sa CESAFI futsal ug ingon man nahimong rayna sa Under 18 division sa Aboitizland Football Cup.
- Latest
