Magis eagles TV Desiderio, Manzo mopaambit sa ilang kaagi sa basketbol

CEBU, Philippines — Ang duha ka kanhi mga bitoon sa CESAFI ug UAAP nga sila si Paul Desiderio ug Jun Manzo maoy mga dinapit sa sunod nga edisyon sa Magis Eagles TV karong adlawa.

Sila si Desiderio ug Manzo mopaambit sa ilang kinabuhi isip mga basketbolista, apil na ang mga kalisdanan ug hagit nga ilang naagian sa wala pa maangkon ang kalampusan nga ilang natagamtaman karon.

Ila kining isaysay sa senemanang TV sports show sa Ateneo de Cebu nga makita live sa Facebook page sa Magis Eagles Basketball Team  karong alas-7:30 sa gabii.

Ang 23-anyos nga si Desiderio, lumad gikan sa Liloan, maoy Juniors MVP sa dihang nakampiyon ang UV Baby Lancers sa CESAFI niadtong 2011.    

Miduwa siya sa UP Maroons sa kolehiyo diin siya mikulit og mabungahon ug makasaysayanong karera.

Si Desiderio nga nagduwa na karon uban sa Blackwater Elite sa PBA, maoy reponsabli sa paglabnot ni Manzo gikan sa UV Lancers aron ipaslak sa Maroons.

Tuod man, si Manzo mihimo sab og impresyon isip team captain sa Maroons sa katapusan niyang season sa UAAP niadtong miaging tuig.