Blazers Mipaduol sa playoffs

CEBU,Philippines — Nausban ni Damian Lillard ang iyang career-high nga 61 puntos sa dihang ang Portland Trail Blazers mikulit og krusyal nga daog batok sa Dallas Mavericks sa iskor nga 134-131 aron pahayagan ang ilang tsansa nga makasud sa NBA playoffs kagahapon didto sa ESPN Wide World of Sports sa Orlando, Florida.

Sa kanunay nilang paggukod sa Memphis Grizzlies alang sa katapusang luna sa playoffs, ang bola anaa na karon sa  mga kamot sa Blazers gumikan sa paglayat nila sa ikawalong puwesto sa Western Conference.

Kon ugaling mapilde sa Portland ang Brooklyn Nets karong Biyernes, hayan nga ang Blazers maoy mosakmit sa ikawalong ug katapusang luna sa Western Conference playoffs diin si LeBron James ug ang Los Angeles Lakers maoy haring gangis.

Sa laing duwa, ang Phoenix Suns miinat sa nagkadena nilang daog didto sa NBA bubble ngadto sa pito ka duwa pinaagi sa paglubong sa Philadelphia 76ers sa sa iskor nga 130-117.

Nagmangtas gihapon ang alas sa Suns nga si Devin Booker nga mipaksit og 35 puntos, siyam ka rebounds ug pito ka assists.

Samtang ang San Antonio Spurs duna pa sa'y paglaum nga makataak sa playoffs dihang ila sab nga gilubong ang Houston Rockets sa iskor nga 123-105 ubos sa pagpangu ni Keldon Johnson nga mitali og 24 puntos. Uban sa Grizzlies ug Suns, ang Spurs alkansi lamang og usa ka lugas sa Blazers mao nang kulbahinam kaayo kon kinsa'y makaangkon sa ikawalong luna sa Western Conference playoffs.