Allowance sa national athletes ug coaches Apil sa Bayanihan 2

CEBU, Philippines — Mipahibalo si Philippine Olympic Committee (POC) President Abraham 'Bambol' Tolentino nga apil sa ilang Bayanihan 2 proposal nga giaprubahan na sa kongreso ang pagbalik sa binulan nga allowance sa tanang mga national athletes ug coaches.

Kahinumduman, nga ang P110 million nga gitagana unta sa Philippine Sports Commission (PSC) alang kanila naputol gumikan kay dakong bahin sa pundo gigasto man sa pakig-away sa nasud batok sa Covid-19.

Gumikan niini, si Tolentino nangusog nga malakip ang pundo alang sa mga nasudnong atleta sa Bayanihan 2.

“By giving them the adequate allowances they deserve, we prove to our national athletes and coaches that we appreciate all their efforts and sacrifices and that we continue to support them especially during these trying times. We also included an additional P5,000 Covid Situation assistance on top of their allowances, ” matud pa Tolentino.

Ang pangulo sa POC nga representante sab sa ikawalong distrito sa Cavite, nagpasalamat ni House Speaker Alan Peter Cayetano nga miabag kaniya aron mapalusot ang iyang sugyot sa ubos balay balauranan.

Ila na lang karon gihuwat ang approval sa Senado aron hingpit nang mapatuman ang Bayanihan 2 nga naglaraw mohatag og laing hugna sa ayuda niadtong mga labing apektado ning pandemiya nga mihamok sa tibuok kalibotan.