Crawford, Mcgregor lagmit sunod makontra ni Pacquiao
CEBU, Philippines — Kon ugaling makahukom na si Pinoy ring star Manny Pacquiao nga moaway og balik, lagmit iyang makontra mao ang wa'y pildeng WBO welterweight champion nga si Terence Crawford o dili ba si UFC superstar Conor McGregor.
Matud pa sa 41-anyos nga si Pacquiao nga gikonsiderar niyang makigsangka batok ni bisan kinsang bug-at nga pangan sa welterweight division. Unang miulbo ang taho nga gisaytan ni Pacquiao si IBF middleweight champion Gennady 'GGG' Golovkin, apan mismo si Pacquiao ang mihimakak niini kay dako ra kaayo alang kaniya si Golovkin. Lain pang mga posibleng kontra ni Pacquiao mao sila si Mikey Garcia ug WBC/IBF unified champion Errol 'The Truth' Spence Jr. Apan gumikan kay si Spence gikatakda mang modepensa sa iyang mga bakus batok ni Danny Garcia karong Nobiyembre, napapas kini kaniya sa eskena sa pagka karon.
Mao nang si Crawford na lang ang labing lig-ong kontra nga puwedeng iparang kang Pacquiao.
Lain pang pangan nga gituboy aron makaharong ni Pacquiao mao si McGregor nga bisan anaa sa laing kalibotan sa sports kursanada kaayong makigboksing sama sa iyang gibuhat batok ni Floyd Mayweather Jr. tulo ka tuig na ang milabay. Napilde man tuod, apan si McGregor nakabulsa og dul-an sa $100 million sa ilang sangka ni Mayweather.
- Latest
