Sugboanon no. 2 na sa E-Kata world rankings

CEBU, Philippines — Ang Sugboanong karateka nga si Orencio James 'OJ' de los Santos padayong naghatag og dungog sa nasud nga Pilipinhon.

Niadtong Huwebes,  si De los Santos mipahibalo pinaagi sa iyang Facebook nga milayat siya gikan sa ikatulo ngadto na sa ikaduhang dapit sa e-kata world rankings.

"The hard training is paying off and the points have been added. I've jumped to No. 2 in the virtual kata world rankings. The journey to number 1 won't be easy. But that will give me more reason to train harder. Laban Pilipinas," suwat pa ni  De los Santos.

Ang 30-anyos nga si De los Santos nahimong ikaduhang labing maayong online karateka sa kalibotan sunod ni Eduardo Garcia sa Portugal human iyang gidominar ang Balkan Open niadtong Agosto 2. Iyang naapsan ang Italyanong si Leonardo Birra.

"Honestly, I thought I would still be at No.3 just by a few points behind.  There were other tournament that I joined but didn't make it far. However, they also added points along with my recent gold medal win, surprisingly enough for me to climb to No.2,"  paambit pa ni De los Santos.

Ang impresibo niyang salida sa 12 ka mga kompetisyon nga iyang gisalmotan sa milabay'ng upat ka bulan diin siya nakakolekta og tulo ka golds, usa ka silver ug usa ka bronze lagmit makaabli sa pultahan sa posibleng  pagbalik ni De los Santos sa Philippine team.

Apan wala kana karon sa huna-huna ni De los Santos.

Ang two-time Southeast Asian (SEA) Games bronze medalist misalikway nga makauban og balik ang kanhi niya Phl teammates human siya kalit nga gitangtang sa national team sa 30th SEA Games sa miaging tuig dinhi sa nasud.

“With all that has happened in the last SEAG, it wouldn’t be possible with this current NSA (national sports association) and especially with the way I was removed from the SEAG lineup,” sumala pa ni De los Santos ngadto ni Joey Villar sa The Philippine STAR. Bisan pa man niini, si De los Santos padayon nga nanikaysikay ug nangita'g paagi nga makahatag og garbo ug dungog sa iyang mga kababayan.

“I’m currently competing in the Athlete’s E-Tournament, which is hosted by Russia online and hopefully I could gain more world ranking points there,” kanayon pang de los Santos.