Gab mihata'g opsiyon sa PBA teams

CEBU, Philippines — Mismo si Games and Amusements Board (GAB) chairman Baham Mitra ang miingon nga ang usa ka "semi-bubble" sa mga lugar sama sa Batangas, Bataan ug Quezon mahimong  opsiyon alang sa mga PBA teams nga mopahigayon sa ilang  workouts.

Basta ang target nilang rehiyon ubos lamang sa GCQ o sa mas luag pang kwarantin, ang mga pro teams makasud sa bubble nga aprubado sa mga probisyon sa Joint Administrative Order (JAO) nga gipirmahan sa GAB,  Department of Health ug Philippine Sports Commission.

Apan ang mga teams kinahanglan nga mananghid una sa PBA Commissioner's Office ug sa LGU (local government unit) nga dunay hurisdikyon sa lugar diin sila buot nga mag-training.

"I have to check their guidelines and protocol," matud pa ni PBA commissioner Willie Marcial segun sa taho sa PBA.ph

Apan ang mga PBA teams gustong maghuwat nga ang Metro Manila mabalik na sa mas luag nga kwarantin kay sa mag-training gawas sa National Capital Region gumikan kay ilang gilantaw ang kaluwasan sa tanan.

Ang mga koponan sa liga nagpanikad na untang makabalik sa ilang praktis, apan nabaraw ang ilang plano gumikan kay gibalik man ni Presidente Rodrigo Duterte ang quarantine status sa Manila ngadto sa MECQ segun sa hangyo sa mga medical frontliners. Malaumon hinuon si Mitra nga mabalik ra sa GCQ ang Manila sud sa duha ka semana.