Volleyball star nangandam sa beauty pageant

CEBU, Philippines — Isip usa sa labing maayong volleyball player sa nasud, daghan na og hagit ug mga pagsulay nga naagian si Michele Gumabao.

Duna na sa'y laing hagit siyang sagubangon. Apan wala kini kalambigitan sa paugnat sa kusog.

Ang 27-anyos nga si Gumabao kasamtangan karong nangandam alang sa Miss Universe Philippines pageant, usa ka mas lisud nga tahas  nga iyang atubangon taliwala ning pandemiya.

Si Gumabao misalmot sa Binibining Pilipinas niadtong 2018 ug naangkon ang katungod nga morepresentar sa nasud sa Miss Globe diin siya nalandig sa top 15.

Dad-on niya ang pangan sa Quezon City isip usa sa 51 ka mga nangindahay nga koronahan isip Miss Universe Philippines karong Oktubre 25.

Ang finals gikatakda unta niadtong Mayo 3, apan gisibog kini sa Hunyo 24 ngadto na sa Oktubre gumikan ning kalibutanong krisis panglawas.

Si Gumabao nakadaog og tulo ka kampiyonato sa UAAP uban sa La Salle ug nahimong Finals MVP niadtong Season 75.