Magsayo moaway karong September 23
CEBU, Philippines — Si Mark Magsayo moaway sa labing unang higayon ubos sa MP Promotions ni Manny Pacquiao karong Septiyembre 23 didto sa Microsoft Theater sa Los Angeles, California.
Lagmit makontra ni Magsayo mao si Jose Haro nga usa ka higayon mipa-ospital ug miparetiro sa iyang kontra.
Ang garbo sa Tagbilaran City sa Bohol nga si Magsayo wala pa'y pilde sa 20 ka away diin 14 sa iyang mga biktima iyang gipatikangkang. Si Haro dunay 15-1-1 record uban ang 8KOs. Matud pa ni MP Promotions President Sean Gibbons nga duha na lang ka away ang gikinahanglan ni Magsayo sa dili pa kini makaaway alang sa world title.
Sa miagi niyang pagtikang ibabaw sa ring kapin sa usa ka tuig na ang milabay, gipukan ni Magsayo si Panya Uthok sa Thailand pinaagi sa unanimous decision atubangan sa iyang mga paisano didto sa Tagbilaran.
Sa kasamtangan, si Magsayo hugtanon nga nag-training didto sa Wild Card Gym ni Hall of Fame trainer Freddie Roach didto sa Hollywood, California.
- Latest
