Kontra ni Pacquiao naibanan

CEBU, Philippines — Naibanan ang listahan sa mga posibleng sunod makontra ni Pinoy ring star Manny Pacquiao (62-7-2, 39KOs).

Kini gumikan kay sila si Errol Spence Jr. ug Danny 'Swift' Garcia gikatakda na man nga magsangka karong Nobiyembre 21 sa wala pa hisayring binyu. Depensaan ni Spence ang duha niya ka korona isip WBC ug IBF welterweight champion.

Si Spence wala pa'y pilde sa 26 ka away diin 21 sa iyang mga biktima iyang gipalukapa, samtang si Garcia, kanhi super welterweight world champion gikan sa Puerto Rico, nagkupot og 36-2 record uban ang 21KOs.  Sa pagkasado sa bugno nilang Spence ug Garcia, ang walay pildeng WBO welterweight champion nga si Terence Crawford (36-0,27KOs) mao na lang ang nagpabiling lig-on nga pangan nga posibleng makaharong ni Pacquiao kon ugaling makahukom na ang Pinoy'ng senador nga mobalik og away sa umaabot.