25 ka basketbol reperi miapil sa refresher/seminar sa Toledo

CEBU, Philippines — Kawhaa'g lima (25) ka mga  reperi sa basketbol didto sa Toledo City ang miapil sa referee refresher/seminar nga gipasiugdahan sa Cebu Basketball Referee Association (CEBRA) niadtong Sabado didto sa Tubod Sports Complex sa maong dakbayan.

Ang mga partisipante gitudloan sa basic rules theory, techniques ug uban pa.  Gitudlo sab ang mechanics sa officiating. "Among giaktuwal sila, gipadagan, gipapito kon asa sila dapit motawag," matud pa ni Cebu Schools Athletic Foundation, Inc. (CESAFI) head referee Edwin Dejacto Sr. "Human, gitudloan sab sila sa signalling.

Gipakuysoloan ni Dejacto ang mga partisipante, nga kon makat-on na og maayo, tagaan sila og slot nga makadagan sa CESAFI. Ang usa ka adlaw nga refresher/seminar nahimo pinaagi sa paningkamot ni Ernesto Jaranilla, ang presidente sa reperi sa Toledo.

Gidumala ang seminar nilang Edwin Dejacto, CEBRA president Ed Aguelo ug Marlon Espante.