Makasaysayanong dalan sa sugbo

CEBU, Philippines — Wala man tuod mahisayri sa uban, apan dunay  makasaysaynong dalan sa Sugbo nga gipangan sa mga banggiitang Sugboanong atleta.

Apil na niini ang C. M. Cabahug Street sa Barangay Looc  Dakbayan sa Mandaue. Ginganlan kini gikan ni Cesar Mendoza Cabahug, sakop sa Visayan Institute (nga karon mao na ang University of the Visayas) nga nakampiyon sa 1938 National Open. Sa susamang tuig, sila lamang maoy Phl team nga nakapilde sa bisitang Waseda University ballclub sa Japan.

Usa ka notadong manlalaban gikan sa prominenteng Cabahug nga kaliwat, nasemento sab ang iyang pangan sa pag-usab sa Looc Elementary School ngadto sa Cesar M. Cabahug Elementary School sa Looc.

Ang iyang anak nga si Cesar Jr. nakonsehal sa Mandaue, samtang ang lain niyang anak nga si Eduardo 'Eddie' Cabahug ug apo nga si Elmer 'Boy' Cabahug mingkulit sa ilang pangan sa kalibotan sa basketbol.          

Gibansagan nga "Skipper", si Eddie Cabahug maoy sinaligan ug co-captain sa UV Green Lancers nga naghari sa 2nd National Inter-Collegiate Championships didto sa Rizal Memorial Coliseum sa Manila adtong 1957. Ubos ni coach  Eduardo 'Eddiegul' R. Gullas ug co-captain Jose 'Dodong' R. Gullas, gibuntog sa UV ang Ateneo Blue Eagles sa final, 64-53 sa labing unang duwa nga gipasalida sa telebisyon sa kasaysayan sa Pilipinas.

Ang apo ni Cesar nga si Elmer Cabahug mipatak sab og dungog isip labing una ug bugtong UV player nga nakadaog og MVP award, championship sa CAAA nga mao na karon ang CESAFI ug national title sa high school ug college. Misamot pa ang kasikat ni Elmer sud sa 10 ka tuig sa PBA diin siya naapil sa Mythical Second Team selection, na All-Star MVP ug nakalangkat og duha ka kampiyonato. Sa Barangay Alang-Alang sa Mandaue, dunay Orlacsan Street nga gimugna agi'g pagtamod ni sports journalist Orlando C. Sanchez.

Kanhi campus journalist sa UV nga nahimong  sports journalist, si Sanchez nahimong  sports editor sa The Freeman sa wala pa mibalhin sa SunStar nga iyang giserbisyohan sa wala pa namatay niadtong 1994, ang tuig diin natukod ang Cebu City Sports Center ug ang Sugbo naka-host sa Palarong Pambansa sa labing unang higayon.

Agig pagyukbo sa maayo niyang nabuhat sa kalibotan sa sports, ang Association of Cebu (SAC) mihingan sa usa sa labing dako niining pasidungog alang kaniya, ang ORLACSAN Memorial Award.

Kon ikaw moagi sa Lucas Gabuya Street sa Barangay Mambaling padung sa SM-Seaside City sa South Road Properties, imong makita ang F. S. Vestil street.

Ang maong eskena agi'g pagbayaw ni Francisco Sanchez Vestil, ang nagdala sa bandila sa nasud atol sa 1948 London Olympics. Guest player siya sa dihang ang  Visayan Institute (UV na karon) nahimong National Open champion adtong 1938. Sakop sab siya sa VI nga maoy labing unang provincial team nga nahimong nasudnong nakampiyon didto sa Iloilo City.

Gitawag nga "Bay" sa iyang mga suod, si Vestil sakop sa University Sto. Tomas Glowing Goldies (karon UST Growling Tigers) nga na-grandslam sa UAAP gikan sa 1946 ngadto sa 1948. Gikoronahan siya nga MVP niadtong 1947.

Si Vestil usa sa labing unang atleta nga gibayaw sa Cebu Sports Hall of Fame. Gihatod siya sa Philippine Sports Commission (PSC) ngadto sa National Basketball Hall of Fame adtong 1999.

Dili mahikalimtan si Gabriel 'Flash' Elorde nga duna sa'y dalan nga gipahinungod alang kaniya.

Niadtong Nobiyembre 14, 2017, usa ka eskena ang gibunyagan sa Cebu City Cultural and Historical Affairs Commission (CHAC) aron pagtahod ni Elorde.

Ang karaan nga dalan nga gingan gikan ni Elorde mao ang Ganciang, usa ka eskena nga nagkonektar sa F. Llamas street sa Barangay Punta Princesa ngadto sa Maria Gochan sa Barangay Mambaling.

Si Elorde (March 25, 1935–January 2, 1985) miaway isip pro boxer niadtong Hunyo 6, 1951 ngadto sa Mayo 20, 1971 uban ang 89-27-2 (33KOs) record.

Mikulit siya og dungog isip labing taas nga Pinoy'ng boksidor nga nahari isip world champion sud sa 50 ka tuig, usa ka rekord nga gibuak ni Donnie 'Ahas" Nietes sa ALA Gym niadtong 2013. Si Elorde gibayaw ngadto sa International Boxing Hall of Fame niadtong 1993.

Sila si Elorde, Cabahug, Vestil ug Sanchez mipanaw na, apan silang tanan nakakulit sa dughan sa tanan gumikan sa dili mahikalimtan nilang dungog ug kadungganan.