Hontiveros mipaambit leksiyon sa kinabuhi

CEBU, Philippines — Sangko sa langit ang gibati niyang kahinam nga moduwa sa labing unang higayon uban sa Cebu Gems sa labing unang duwa sa Metropolitan Basketball Association (MBA) 22 ka tuig na ang milabay.

Nagpanikad siyang mokulit og impresiyon human gipasud ni coach Leoncio 'Jun' Tan Jr. isip kabahin sa First 5 sa Gems batok sa Manila Metrostars sa makasaysayanong duwa sa liga niadtong Marso 7, 1998 didto sa Don Narciso Ramos Sports Complex sa Lingayen, Pangasinan.

Apan sa nakaon nga 30 segundos pa lamang sa duwa, si Cebuano hotshot Donaldo 'Dondon' Hontiveros na-injured.

Nabuak ang tuo niyang kamot human maigo sa siko ni Peter Martin. Seryoso kaayo ang angol ni Hontiveros nga nakapalingkod kini kaniya sud sa tulo ka bulan.

Daw sa nahugno ang kalibotan ni Hontiveros niadtong higayona.

"My thoughts at that time was that I had a dream of making it big someday and provide for my family. I was given an opportunity but it's not guaranteed that you will be the leader of the team because we have a lot of good and talented players," paambit pa ni Hontiveros nga konsehal na karon sa dakbayan sa Sugbo. "We had Stephen Padilla, Mike Manigo, Leode Garcia, Richard Caliao, Rob Wainwright, and we even had two Fil-Ams in Rob Duat and Chris Mendoza."

"They were more experienced I would say. It's the first year of the league and everybody will try to make a name for himself. I had to work really hard before the start of the season leading to the very first game and to get injured was such a huge blow," dugang pa ni Hontiveros.

Apan imbes nga masugamak sa kagul-anan, ang garbo sa Don Bosco ug University of Cebu (UC) milantaw sa pagsulay nga miharos sa iyang dalan isip usa ka hagit dayong himo niining hagdanan ngadto sa kalampusan.

Human siya nakarekober gikan sa injury, nakuha dayon ni Hontiveros ang pagsalig ug kompiyansa ni Tonichi Yturri, ang bag-ong coach sa Gems sa iyang pagbalik.

"I was out for three months and got the trust and confidence of coach Tonichi (Yturri). Thankfully, I was able to recover strong," matud pa ni Hontiveros nga maoy gibayaw nga All-Star MVP ug "Discovery of the Year" bisan og nakapalta og tulo ka bulan sa labing unang season sa MBA.

Ang 6-foo-1 wingman nga nailhan sa kahait sa iyang tinirahan mi-average og 15 points ug 4.0 rebounds matag duwa aron tabangan ang Gems nga makataak sa Southtern Conference finals batok sa Negros Slashers.

Usa na lang unta ka daog ang ilang gikinahanglan aron sakmiton ang korona human miposte og 3-1 nga bentaha sa ilang best-of-seven series, apan napakyas human gisagunsonan og tulo ka pilde sa Slashers ni coach Jun Noel.

Bisan pa man niini, usa gihapon kadto ka mabungahon ug mabulukon nga tuig alang sa 43-anyos nga si Hontiveros.

Si Hontiveros nga mas misikat pa sa dihang naabot sa PBA diin siya nakabira og tulo ka kampiyonato ug nahimong sakop sa All-Star 11 ka higayon, gusto nga impaambit ang iyang leksiyon sa kinabuhi labi na ning panahon sa kalisdanan nga dili mawagtangan og paglaum ug sa kanunay masaligon sa kinabuhi.

"In a way, that injury made me a better player. It made me work even harder. With your family as inspiration, you will strive hard no matter how tough the situation is," sumala pa Hontiveros. "You see trials as challenges and think of ways to overcome these to reach your goal."