Labangon, mabolo nanghawodsa 1st CCSC Online Dancefest
CEBU, Philippines — Mikawat og atensyon ang mga pambato sa Labangon ug Mabolo sa second leg sa 1st Cebu City Barangay Grassroots Online Dancesport Competition niadtong weekend.
Gipangulohan ni Shane Barrientos, ang Labangon nakahakot og 21 ka medalya nga gibuak ngadto sa upat ka golds, 10 ka silvers ug pito ka bronzes, samtang ang Mabolo nakapugnit sab og upat ka bulawang medalya.
Si Barrientos nakamina og duha ka bulawan sa juvenile II girls chachacha ug jive. Ang iyang teammate nga si Prince Jayvey Pasigna maoy nakampiyon sa juvenile I boys chachacha ug jive, samtang si Keemo Mojica naghari sa juvenile II boys jive.
Si Pauline Venice Duba nakalabni og duha ka golds alang sa Mabolo pinaagi sa junior I girls chachacha ug jive. Mao sab ang nakab-ot sa iyang teammate nga si Paul Vincent Corpus sa junior II boys chachacha ug jive.
Samtang ang Tisa, Talamban, Cogon-Ramos ug Minglanilla mikubkob og tagurha ka bulawang medalya.
Si Chanice Mendoza nakaduha ka golds alang sa Tisa sa juniors II girls chachacha ug jive, si Dylan Jacob Esmero mihipos og duha ka golds alang sa Talamban sa junior I boys chachacha ug jive, samtang si John Tonni Fiel Quilaton nakasakmit og duha ka golds alang sa Cogon-Ramos sa youth boys chachacha ug jive.
Naangkon sa Minglanilla ang kaluha nilang golds gikan ni Krissan Danielle Unabia sa youth girls chachacha ug jive.
Ang uban pang naka-gold medals mao sila si Michaela Mirabueno sa Pardo (juvenile I girls chachacha), Johaida Oasan sa Tejero (juvenila I girls jive), ug Rayle Sagarino of City Central School (juvenila II boys chachacha).
- Latest
