LeBron naputos og pagsaway

CEBU, Philippines — Naputos og mga pagsaway si LA Lakers superstar LeBron James human kini mipahibalo nga dili siya magpabutang sa mga pulong nga "Black Lives Matter" sa luyong bahin sa iyang uniporme nga aprubado sa NBA atol sa pagsugod og balik sa liga.

Ang maong lakang gituyo sa liga aron paghatag og katungod sa mga players niini nga mopadayag sa ilang sentimento ug moduyog sa protesta batok sa wa'y katapusan nga isyu sa "racism" dili lamang sa Amerika, apan sa tibuok kalibotan.

Apan si James naputos pagsaway gumikan sa pagdumili niya pag-apil sa maong kawsa.

Duna sab hinuo'y midapig ni James pinaagi sa pagpahinumdum sa kadaghanan sa mga maayong gawi ug binuhatan sa four-time MVP ug three-time NBA champion ilabi na ngadto sa mga kabus ug hinikawan sa maayong palad.

Sa iyang bahin, si James dali nga nakapasabot sa iyang aksiyon.

"I commend anyone that decides to put something on the back of their jersey. It's just something that didn't seriously resonate with my mission, with my goal," matud pa ni James.