Slaughter dili na mobalik sa Ginebra?
CEBU, Philippines — Sa pagpirma ni Greg Slaughter og kontrata uban sa BeoBasket, usa ka notadong international basketball agency, si Barangay Ginebra coach Tim Cone nanghinuklog kon ang 7-footer nga sentro mobalik pa ba sa ilang poder.
Si Cone daan nang mipadayag nga bukas siya sa posibilidad sa pagbalik ni Slaughter sa Gin Kings, apan gumikan ning labing uwahing kalamboan sa karera sa Sugboanong Fil-Am, mag-agad na lamang siya sa sitwasyon.
“I’m very happy for him but I don’t know what that means regarding his return to Ginebra,” matud pa ni Cone segun sa taho sa The Philippine STAR. “We’ll just have to wait and see.”
Pinaagi sa iyang social media, gipahibawo ni Slaughter nga nakig-alyansa siya sa BeoBasket nga nagrepresentar sa pipila ka mga international players sa NBA ug EuroLeague sama nilang Nikola Jokic, Cedi Osman ug Marko Guduric.
“I’m extremely honored to be the first Filipino in their roster,” matud pa ni Slaughter, nga nakadaog og duha ka kampiyonato uban sa University of the Visayas (UV) Green Lancers sa dihang nagduwa pa siya sa Cebu Schools Athletic Foundation, Inc. (CESAFI).
“Wherever my journey takes me, I will always proudly represent the Philippines, especially our national team,” dugang pa Slaughter nga temporaryong mipahuway gikan sa basketbol human napupos ang iyang kontrata uban sa Ginebra niadtong Enero. Kabahin sa mga plano ni Slaughter nga maapil siya sa Gilas Pilipinas nga mokumbati sa 2023 FIBA World Cup.
- Latest
