Embiid nagsul-ot og hazmat suit padung sa Orlando
CEBU, Philippines — Ang mga NBA superstars gisud-ong sa mga fans dili lamang sa ilang abilidad ug pagka-modelo ug pilantropo, apan hasta sab sa ilang estilo sa panamit.
Ning higayona, si Philadelphia '76ers All-Star center Joel Embiid nakakuha og atensiyon sa iyang senina, apan sa lahi nga paagi. Kini human si Embiid nagsul-ot og 'Hazmat suit' sa ilang biyahe sa team padung sa NBA bubble didto sa Orlando, Florida diin magsugod og balik ang aksiyon sa liga karong Hulyo 31. Tataw kaayo nga gusto ni Embiid nga duna siya'y lig-on nga taming batok sa gikahadlokang virus nga nagkapaspas ang pagkuyanap didto sa Amerika.
Daan nang namahayag si Embiid nga supak siya ug wa'y salig sa 'bubble' nga giplastada sa NBA didto sa Walt Disney World sports complex sa tinguha nga proteksiyonan ang tanan sa pagtiwas sa liga sa nahibiling bahin sa naputol niining season.
Mipasabot si Embiid nga napugos lamang siya pagduwa og balik kay buot niyang buhaton ang iyang trabaho ug dili sab siya gusto nga mahiubos kaniya ang iyang team ug ang siyudad nga iyang girepresentahan.
- Latest
