Paul Gasol nagselebrar sa iyang birthday uban sa mga anak ni Kobe

CEBU, Philippines — Ang kanhi superstar sa LA Lakers nga si Pau Gasol nagselebrar sa ika-40 nga sumad sa adlaw niyang natawhan uban sa pamilya sa mipanaw niyang teammate nga si Kobe Bryant.

Si Gasol nga nakauban si Bryant sa Lakers gikan niadtong 2008 ngadto sa 2014, nagsaulog sa espesyal niyang adlaw uban ang tulo ka mga anak ni Kobe nga sila si Natalia, Bianka ug Capri ug sa biyuda niining si Vanessa.

Pinaagi sa pribado niyang Instagram account, si Vanessa mipadayag sa iyang pagdayeg sa gibuhat ni Gasol nga makatandog sa dughan.

"Happy 40th birthday uncle Pau! We love you. Love, The Bryant Girls. I know Kobe would say, 'Happy 40th birthday Pablo! Love you, Hermano'," suwat pa ni Vanessa.

Atol sa ilang panahon sa Lakers, sila si Gasol ug Bryant nakadaog og duha ka sagunson nga kampiyonato niadtong 2009 ug 2010.

Sa ilang panag-uban, sila si Gasol ug Bryant nakahulma og tiunay nga panaghigalaay diin usa ka higayon si Kobe namahayag nga dili niya masakmit ang maong mga titulo kon dili pa tungod ni Gasol.        

Si Bryant, uban sa iyang dalagita nga si Gianna, namatay sa helicopter crash nga mikutlo sab og lain pang pito pa ka mga kinabuhi niadtong Enero didto sa Calabasas, California.